Happy Mother's Day...

ಕೇವಲ ರಕ್ತ, ಮಾಂಸ,

ಮಜ್ಜೆಯಿಂದ ಕೂಡಿದ

ಈ ಅವಿವಿವೇಕಿಗೆ,

ಪ್ರೀತಿ, ಬಂಧ, ಮನಸು, ಬಿಸುಪು,

ನೆನಪು, ಕನಸು, ವಾತ್ಸಲ್ಯ, ಖುಷಿ,

ಸಮಾಧಾನ, ಹಠ, ಛಲ, ಸಾಂಗತ್ಯ,

ಧೈರ್ಯ, ಪ್ರಾಮಾಣಿಕತೆ, ಬದುಕು

ಎಲ್ಲವನ್ನೂ ಕೊಟ್ಟು ಬಿರು ಬೇಸಿಗೆಯಂತಹ

ಬದುಕಿನಲಿ ಕೇವಲ ನಿನ್ನ ಪ್ರೀತಿಯ

ತುಂತುರುವಿನಲಿ

ಕೈ ಹಿಡಿದು ನಡೆಸುತ್ತಿರುವ ಅಮ್ಮಾ...

ನಿನದು ಅಕ್ಷರಕೆ ನಿಲುಕದ ಬಂಧ.

I Love You.

Happy Birthday...

ಡಿಯರ್ ಸೋನು,

ನೀನು ಹೊದಿಕೆ ಸರಿಸಿ ಕಿಟಕಿಯೆಡೆಗೆ ಕಣ್ಣು ಬಿಡುವ ಹೊತ್ತಿಗೆ, ಈ ಪತ್ರದ ಬಿಸುಪು ನಿನ್ನ ಮನವನ್ನು ನವಿಲುಗರಿಯಂತೆ ತಾಕಲಿ. ನಿನಗೊಂದು ಅದ್ಭುತವಾದ ಸುಪ್ರಭಾತ!!!

ಕೊಂಚ ಕಿಟಕಿಯೆಡೆಗೆ ಬರ್ತಿಯಾ? ಕಣ್ಣು ಪಟ ಪಟಿಸಬೇಡ. ಹಾರುವ ಮುಂಗುರುಳಿಗೆ ಸುಮ್ಮನಿರಲು ಹೇಳು. ಕಣ್ಣಲ್ಲಿ ಕೇವಲ ಪ್ರೀತಿ ಇರಲಿ. ಇವತ್ತಿನ ಸೂರ್ಯ ಕೇವಲ ನಿನಗೊಂದು ಬರ್ತ್ ಡೇ ವಿಶ್ ಮಾಡಲೆಂದೇ ನನಗಾಗಿ ಉದಯಿಸುತ್ತಾನೆ!! ಮುಂಜಾನೆಯ ಮೌನ ಕೆಡಿಸುವ ಹಕ್ಕು ಕೇವಲ ಒಬ್ಬ ಸೂರ್ಯನಿಗೆ ಮಾತ್ರ ಇದೆ. ಸ್ವಲ್ಪ ಪೂರ್ವದ ಕಡೆಗೆ ನೋಡು. ಆಕಾಶದಲ್ಲೊಬ್ಬ ಆಗಂತುಕ ಸೂರ್ಯ!!! ನೀನು ನೋಡುತ್ತಾ ನಿಂತ ಸೂರ್ಯೋದಯವನ್ನೇ ನೋಡುತ್ತಾ ಕುಳಿತಿರುತ್ತೇನೆ. ಒಂದು ಕದಲಿಕೆ ಇಲ್ಲ. ಒಂದು ನಿಟ್ಟುಸಿರಿಲ್ಲ. ಪ್ರೀತಿಸುವವರಿಗಾಗಿ ಪ್ರಾರ್ಥನೆ ಮಾಡುವ ಫಕೀರ ತನಗಾಗಿ ಏನನ್ನೂ ಕೇಳಿ ಕೊಳ್ಳುವದಿಲ್ಲ!!!

ಸುಡುವ ಬಿಸಿಲು ತಂಪಾದ ಮಳೆಯಾಗಿ ಭುವಿಗೆ ಆವಿರ್ಭವಿಸುವ ದಿವ್ಯ ದಿನಗಳಲ್ಲಿ ಹುಟ್ಟಿದವಳು ನೀನು. ಅಮ್ಮನ ತೆಕ್ಕೆಯಲ್ಲಿ ನೀನು ಕೊಸ ಕೊಸನೆ ಸದ್ದು ಮಾಡಿ ಚಿಕ್ಕದೊಂದು ಚಿತ್ಕಾರವೆತ್ತಿದಾಗ, ನಿನ್ನನ್ನು ಸೃಷ್ಟಿಸಿದ ದೇವರು "ಪೂರ್ತಿ ನೂರು ವರುಷ" ಎಂಬ ಶರಾ ಬರೆದು ಪೆನ್ನು ಮುಚ್ಚಿ ಇಟ್ಟಿರಬೇಕು!!! ಅವನು ಕರುಣಾಮಯಿ. ತಾನು ಸೃಷ್ಟಿಸಿದ ಸೌಂದರ್ಯ ನೂರು ಕಾಲ ಬಾಳಲಿ ಅಂತ ಬಯಸೋ ಸಂಭಾವಿತ.

ಅವನು ಬಯಸಿದಂತೆ ನೂರು ಕಾಲವೂ ಸುಖ, ಸಮೃದ್ದಿ, ನೆಮ್ಮದಿ, ನಗೆ ಬೆಳದಿಂಗಳಿನಂತೆ ನಿನ್ನ ಬಾಳಲ್ಲಿ ಹರಡಲಿ. ಕೊನೆಗೆ ಎಲ್ಲ ಜಾತ್ರೆ ಮುಗಿದು ದಿಂಬಿಗೆ ಕೆನ್ನೆಯೊತ್ತಿ ನಿದ್ದೆಗೊಂದು ಆಲಿಂಗನ ಅರ್ಪಿಸುವಾಗ ಗೆಳತೀ, ಸುಮ್ಮನೆ ನನ್ನನ್ನೊಮ್ಮೆ ನೆನಪಿಸಿಕೋ ಸಾಕು. ದೂರದಿಂದಲೇ ಉಳಿದ ನನ್ನ ಆಯುಷ್ಯವನ್ನೆಲ್ಲ ನಿನಗೆ ಸುರಿದು ಸುಮ್ಮನಾಗಿ ಬಿಡುತ್ತೇನೆ.

Happy Birthday!!!

ಹುಣ್ಣಿಮೆ...

ನಾಚುತ್ತಾ ಆಕೆ
ಎದೆಯ ಮೇಲಿನ ಹೊದಿಕೆ
ಬದಿಗೆ
ಸರಿಸುತ್ತಾ ಹೋದ ಹಾಗೆ
ಪಾಡ್ಯ, ಬಿದಿಗೆ, ತದಿಗೆ..
(ಡುಂಡಿರಾಜರಿಂದ ಕದ್ದಿದ್ದು...)

ಒಂದು ಸಂಜೆ...

ಇನ್ನೊಂದು ಬೇಸರದ ಸಂಜೆ
ಪಾರ್ಕಿನ ಮೂಲೆಯಲ್ಲಿರುವ
ಕಲ್ಲು ಹಾಸಿನ ಮೇಲೆ ಅದೇ
ಒಬ್ಬಂಟಿ ಮುದುಕ...
ನಿನ್ನೆ ಬಂದ ಮಳೆಗೆ
ಇಂದೂ ಕ್ಲೀನ್ ಆಗದ
ಉದುರಿದ ಎಲೆಗಳು...
ಗೇಟಿನ ಪಕ್ಕದಲ್ಲಿ
ನಿಂತು ಸಿಗರೇಟು ಸುಡುತ್ತ
ತನ್ನ ಕೈ ಕೊಟ್ಟ
ಗೆಳತಿಯನ್ನ ನೆನೆಸಿಕೊಳ್ಳುವ
ಮಧ್ಯವಯಸ್ಕ...
ಬಂದೆ ಬರ್ತೀನಿ ಅಂತಾ
ಹೇಳಿ ಇನ್ನು ಬಾರದ ಹುಡುಗಿಗೆ
ಕಾಯುತಿರುವ
ಮುಗ್ದ ಪ್ರೇಮಿ...
ಬೆಳಿಗ್ಗೆ ಇಂದಲೂ
ಆಗದ ವ್ಯಾಪಾರಕ್ಕೆ
ಚಿಂತೆಯ ಮೋಡ ಮುಸುಕಿದ
ಮುಖದ ಕಳ್ಳೆಕಾಯಿ ಮಾರುವ
ಮುದುಕಿ...
ಇವರೆಲ್ಲರ ಧಾವಂತದ
ಮುಖದಲ್ಲೂ ನಿನ್ನನ್ನೇ
ಹುಡುಕುವ ಹುಚ್ಚ
ನಾನು...
ನನ್ನ ಎಲ್ಲ ನಿರೀಕ್ಷೆಯನ್ನು
ಸುಳ್ಳು ಮಾಡುವ
ಹಠ ಹಿಡಿದ
ನೀನು...

ಮಳೆಯ ಗೆಳೆಯ...

ಮನಸೇ,
ಇವತ್ತು ಹೊರಗೆ ಭಯಂಕರ ಮಳೆ! ಒಳಗೂ ಕೂಡಾ!! ಹೌದು ಪ್ರತಿ ಮಳೆಗೂ ಭಾವುಕ ಮನುಷ್ಯನ ಮನಸಿನಲಿ ಭಾವನೆಗಳ ಅಬ್ಬರವೆಬ್ಬಿಸುವ ಶಕ್ತಿ ಇದೆ. ಅದಕ್ಕೆ ಜೀವಂತ ಉದಾಹರಣೆ ನಾನೇ!!
ಪ್ರತಿ ಮಳೆಯೂ ನನ್ನಲ್ಲೊಂದು ಉತ್ಸಾಹ, ಖುಷಿ, ಸಮಾಧಾನ, ಆಸೆ ಛಲ ತುಂಬುವಂತೆ ನೋವು, ದುಃಖ, ಖಿನ್ನತೆಯನ್ನೂ ತರುತ್ತದೆ. ಸುರಿಯುವ ನೀರಿನಲ್ಲಿ ಹರಿದು ಬರುವದು ಏನೆಂದು ಯಾರಿಗೆ ಗೊತ್ತು? ಎಲ್ಲವೂ ಇದ್ದಾಗಲೇ ಅದು ಬದುಕು ಅಲ್ವಾ?
ಇಷ್ಟು ದಿನದ ಎಲ್ಲ ಬೇಗೆಗಳನ್ನು ತೊಳೆದು ಹಾಕಲೆಂದೇ ಬಂದಂತಿತ್ತು ಈ ಬಿರುಮಳೆ. ಮಳೆ ಜೊತೆ ಆಲಿಕಲ್ಲು ಕೂಡಾ! ಖುಷಿಯಿಂದ ಮಳೆಯ ತುಂತುರುವಿನಲಿ ನಿಂತವನ ಎದೆಗೆ ಬಿದ್ದ ಆಲಿಕಲ್ಲು ನಿನ್ನ ನೆನಪಿನಂತೆ ಅದೇ ಸುಮಧುರ ಯಾತನೆಯನ್ನು ಹೊತ್ತು ತಂದಿದ್ದು ಆಶ್ಚರ್ಯ!!
ಪ್ರತಿ ಹಸಿವೆಗೂ ತಾಯಿಯತ್ತ ನೋಡುವ ಮಗುವಿನಂತೆ ಸುರಿಯುವ ಮಳೆಯನ್ನೇ ನೋಡುತ್ತಿದ್ದೆ. ನನ್ನ ಮಳೆಯ ಹಸಿವು ಅಗಾಧವಾದದ್ದು, ಅನಂತವಾದದ್ದು! ಹೌದು ನಾನು ಮಳೆ ಹಸಿವಿನ ಮನುಷ್ಯ!! ನನ್ನ ಹಸಿವನ್ನು ತಣಿಸಲು ಬಂದ ಮಳೆಯ ರುದ್ರ ರೂಪ ನಿನಗಾಗಿ...





ಬೀಳುವ ಆಲಿಕಲ್ಲಿನ ತಂಪಲ್ಲೂ ನಿನ್ನನ್ನೇ ಹುಡುಕುತ್ತಿದ್ದ
ಆಸೆಬುರುಕ...

ಜೇನು - ನೀನು

ಅಲ್ಲಿ ಹುಟ್ಟಿನ ಒಳಗಿದ್ದರೆ

ಇಲ್ಲಿ ಮೈ ತುಂಬಾ

ದುಂಬಿಗಳ ಕಷ್ಟದ ಫಲ

ಸೃಷ್ಟಿಕರ್ತನ ಛಲ

ತಿಂಗಳುಗಳ ಸಾರ್ಥಕತೆ

ವಾರ್ಷಿಕ ಮೊತ್ತ

ತಿಂದರೆ ಸಿಗುವ ಸುಖ

ನೋಟಕ್ಕೆ ದಕ್ಕುವ ಮಜ

ಅಲ್ಲಿ ಹನಿ ಹನಿ

ಇಲ್ಲಿ ಬೊಗಸೆ ಬೊಗಸೆ

ಅಲ್ಲಿ ಬಾಯ್ತುಂಬ

ಇಲ್ಲಿ ಕೈ ತುಂಬ

ಬಣ್ಣಗಳೆರಡಿದ್ದರೂ ರುಚಿ ಮಾತ್ರ ಒಂದೇ

ಎಂದೆಂದಿಗೂ ಮರೆಯದಂತೆ

ಮಳೆಯೋಲೆ...

ಒಂದು ಸುಂದರ ಸಂಜೆಯ ಜಡಿ ಮಳೆಯಲಿ ನೆನೆದು ತಂಪಾಗಿ ಬಂದವನ ಎದೆಗೆ ಬಿಸಿಯುಸಿರು ತಗಲುವಂತೆ ನಿಂತವಳೇ ಈ ಮಳೆಗೂ ಪ್ರೀತಿಗೂ ಅನೇಕ ಸಾಮ್ಯ.
ನನ್ನಂತೆ-ನಿನ್ನಂತೆ!!
ಪ್ರೀತಿಗೆ ಮಳೆ ಬೇಕು. ಎಲ್ಲದಕ್ಕೂ ಬೇಕು. ಮಳೆ ಇದ್ದರೆ ಇಳೆ, ಬೆಳೆ ಎಲ್ಲ. ಮಳೆ ಎಂದರೆ ನೆನಪು. ನಿನ್ನೊಂದಿಗಿನ ನೆನಪು. ಹನಿಗೆ ಮೋಡದ ನೆನಪು, ಮೋಡಕ್ಕೆ ಸಾಗರದ ನೆನಪು, ಸಾಗರಕೆ ಹೊಳೆಯ ನೆನಪು, ಹೊಳೆಗೆ ಬಿದ್ದ ಹನಿಯ ಪುಳಕ. ಸಿಟ್ಟಿಗೆದ್ದರೆ ಕುಂಭದ್ರೋಣ, ಖುಷಿಯಾದರೆ ಧಾರೆ, ಅಂಗಳದ ಕೊನೆಗೆ ಸುರಿದಿಟ್ಟ ತಾರೆ.
ಮೊದಲ ಒಲವ ಮಳೆ
ಅದು ನಿಲ್ಲದ ಮಳೆ
ಮಳೆ ನಿಂತರೂ ಮರದ
ಹನಿ ನಿಲ್ಲುವದಿಲ್ಲ!!
ಮೊದಲ ಮಳೆಗೆ ತೆರೆದುಕೊಂಡ ಮನಸು ಒಳಗೊಳಗೇ ಮುತ್ತಾಗಿತ್ತಾ? ಅಥವಾ ಸ್ವಾತಿ ಮಳೆಯ ತನಕ ಕಾಯಬೇಕಾ?
ಇನ್ನೊಮ್ಮೆ ಸಿಕ್ಕಾಗ ಹೇಳು.
(ಧಾರೆಯಾಗಿ ನನ್ನ ಮೇಲೆ ಪ್ರೀತಿಯ ತುಂತುರು ಚಿಮುಕಿಸಿದ ನನ್ನ ವರ್ಷಧಾರೆಗೆ ಈ ಮಳೆ ನೆನಪಿನ ತಂಗಾಳಿ)